Маңғыстаулық сарбаздар әскерге аттанды

Ақтаудағы қорғаныс істері департаментінің алаңында мерзімді әскери қызметке шақырылушыларды салтанатты түрде шығарып салу рәсімі өтті.

30 әскерге шақырылушы Қонаев қаласының десанттық-шабуылдау бригадасына аттанды.

Салтанатты шараға Қазақстан Қарулы Күштері Бас штабы бастығының орынбасары, Аумақтық қорғаныс департаментінің бастығы, генерал-майор Серік Буранбаев, Маңғыстау облысы әкімінің орынбасары Руслан Бектемір, қорғаныс істері департаменті мен басқармасының басшылығы, ардагерлер,  «Аналар жүрегі» сарбаз аналары комитеті» РҚБ төрағасы Қаламқас Тлеубаева, «Жас сарбаз» әскери-патриоттық қозғалысының тәрбиеленушілері, сондай-ақ, әскерге шақырылушылардың ата-аналары, туыстары мен жақындары қатысты.

Салтанатты шараға жиналғандар жас сарбаздарға Отан алдындағы борышты абыроймен өтеп келуді тіледі.

— Енді сіздердің өміріңізде маңызды кезең басталады. Өйткені  сіздер әскер  қатарына қосыласыздар. Өте қысқа мерзімде бір мамандықты игеруді, тәртіпті және жауапты болуды үйренуіңіз керек. Қарулы Күштерімізге адал болыңыздар және тапсырмаларды абыроймен орындаңыз, — деді генерал-майор Серік Буранбаев.

— Ұлым әскерге аттанып бара жатыр. Отанымыздың қорғаушысы болып өсті деп үміттенемін. Әрине, жіберу қиын. Алайда елдің азаматы болғасын әскерге де баруы шарт. Бірақ мен ұлыма сенемін, — дейді әскерге шақырылушының анасы Гаухар Чалабаева

— Әскерге шақырылушыларды мұқият іріктеу жүргізілді. Олардың денсаулығы мен психологиялық жағдайы, бойы кемінде 175 сантиметр, дене салмағының қалыпты индексі болуы керек. Бұл әскерлерге кіргісі келетіндер жастар арасында жеткілікті болды-бір жерге үш шарт, — деп атап өтті Маңғыстау облысының қорғаныс істері жөніндегі департаментінің бастығы подполковник Руслан Балтемиров.

Еске алу және ризашылық белгісі ретінде әскерге шақырылушыларға Қарулы күштердің атынан естелік сыйлықтар табыс етілді, сондай-ақ Түпқараған ауданының көркемөнерпаздар ұжымы әскерге шақырылушылар мен олардың ата-аналарына арналған концерттік бағдарламамен өнер көрсетті.

Айта кетейік, көктемгі әскерге шақыру науқаны барысында Маңғыстау облысынан 18-27 жас аралығындағы 600-ден астам жас жігітті мерзімді әскери қызметке шақыру жоспарлануда. Оның  250-ге жуығы әскерге шақырылушы Қарулы Күштер қатарына, 240-тан астам адам Ұлттық ұланға, 100-ден астам әскерге шақырылушылар Ұлттық қауіпсіздік комитетінің Шекара қызметіне шақырылады.